Klima, Medisina, Pananampalataya: Resepsyon at Pagtugon sa Paglaganap ng Sakit na Kolera sa mga Lalawigan sa Labas ng Maynila, 1821-1849

Nilalayon ng pag-aaral na ito na lumampas sa kasaysayang nakatuon lamang sa sentro sa pamamagitan ng pagbibigay-diin sa karanasang lokal ng apat na piling mga lalawigan sa kasagsagan ng epidemya ng kolera sa unang hati ng ikalabing siyam na dantaon. Sa pagsasakatuparan nito, sinuri ng pag-aaral ang mga dokumento mula sa Ereccion de Pueblos upang ilahad ang naging resepsyon at pagtugon kapwa ng mga Pilipino at Espanyol sa lalawigan ng Samar, Pangasinan, Zambales, at Camarines Sur. Sa pamamagitan ng mapaghambing na pagsusuri sa mga karanasan ng mga lalawigang ito ay may lumilitaw na kahanayang tumatahi sa lahat. Ipinapakita nito ang magkakahawig na persepsyon hinggil sa kalikasan ng sakit, sa mga pinaniniwalaang sanhi nito, at maging sa isinagawang tugon at lunas. Sa huli, inaasahang makapag-aambag ang pag-aaral sa isang mas malalim at holistikong pagsasakasaysayan ng kolera sa Pilipinas noong unang hati ng dantaon 19—at sa wari, sa kabuuan.