Mga Guro sa Filipino na Nagtuturo ng Asignaturang ‘Di Filipino: Isang Multiple Case na Pananaliksik

Ang layunin ng multiple case na pag-aaral na ito ay upang galugarin ang mga karanasan, tuklasin ang mga mekanismo sa pagharap sa mga hamon at malaman ang mga pananaw sa mga naging karanasan ukol sa paglalakbay sa propesyonal na pag-unlad ng mga gurong medyor sa Filipino na nagtuturo ng asignaturang hindi Filipino. Gamit ang purposive sampling at pamantayan sa pagpipili ng mga kalahok, natukoy ang kalahok na 3 guro sa medyor Filipino na nagtuturo ng asignaturang Science, MAPEH, at Mathematics at lahat sila ay lumahok sa isang malalim na panayam. Ang mga resulta ay nagsiwalat ng mga karanasan ng mga kalahok nakararanas ng hamon sa: Kahirapan sa Pagtuturo dulot ng Kakulangan sa Kaalaman sa Asignaturang Ituturo; Pagsubok sa Pag-unawa ng Teknikal na mga Termino at Kakulangan ng Kagamitan para sa Epektibong Pagtuturo. Bilang tugon sa mga hamon na kanilang naranasan, itinuturing nilang mahalaga ang mga sumusunod na mekanismo sa pagharap ng mga hamon: Wastong Pamamahala ng Oras; Positibong Pagtanggap sa Hamon ng Pagtuturo; Pag-uugnay ng mga Malikhaing Aktibidad at Online Games sa Aralin at pagtanggap sa sariling pangangailangan at sa kasalukuyang sitwasyon. Sa pagninilay-nilay sa kanilang buong karanasan, narating nila ang mga sumusunod na pananaw kahalagahan ng propesyonal na pag-unlad, Kahalagahan ng Pasyon at Dedikasyon sa Pagtuturo, Kahalagahan ng Pagbibigay ng Seminars at Trainings sa mga Guro; Paghihikayat sa Kapwa Guro ay may malaking ambag sa pag-aaral.