Okupasyonal na Varayti ng Wika ng Magkokopra sa Camarines Norte

Binigyang-pokus ng pag-aaral ang pagtatala ng okupasyonal na varayti ng wika bilang batayan sa pagbuo ng identidad ng magkokopra sa Camarines Norte. Ginamit sa pag-aaral na ito ang kalitatibo at etnograpikong disenyo upang maitala at malikom ang datos na kailangan sa pag-aaral. Ang pagmamapang kultural ang naging paraan sa paglilikom ng datos at purposive-convenience sampling naman sa pagtukoy ng mga kalahok. Sa kabuoan ay walo (8) ang naging kabahagi ng pag-aaral na lahat ay pawang matagal nang nagkokopra. Ang mga nakalap namang datos ay sinuri gamit ang thematic data analysis at tabulation. Natuklasan sa pag-aaral na ang 114 salita ay patunay kung gaano natatangi ang magkokopra sa lalawigan. Ang mga pagkakaibang tulad sa heograpikal na lokasyon, sosyo-sitwasyonal na aspekto, ponolohikal na varayti at/o pagkakaiba, pagiging natatangi at/o naiiba sa pangkalahatang salitang ginagamit ng marami ay isang mahalagang aspektong tiningnan ng mananaliksik upang maitampok ang identidad at o pagkakakilanlan ng magkokopra sa lalawigan ng Camarines Norte. Bukod sa mga natuklasan ng pag-aaral ay mahalaga pa ring magkaroon ng higit na pagdalumat, pagkokompara, at pagkokontrast ng mga okupasyonal na varayti ng wika sa iba’t ibang domeyn at/o okupasyon sa buong Bikol. Mahalaga ring magkaroon ng paglilimbag ng mga okupasyonal na varayting ito at maging ang kahulugan upang magsilbing salukan ng mayamang pag-aaral at maging malaking bahagi sa pagsasakatuparan ng layuning intelektuwalisasyon ng Wikang Pambansa ang Filipino.